बेलायतको अक्सफोर्ड विश्वविद्यालयले विकास गरेको कोरोना भाइरसविरुद्धको खोपले प्रतिरक्षा प्रणालीलाई सङ्केत दिन थालेको छ ।
खोप सुरक्षित देखिएको र मानिसको प्रतिरक्षा प्रणालीलाई थप बलियाे बनाउने सङ्केत दिन थालेको विश्वविद्यालयलाई उद्धृत गर्दै बीबीसीले जनाएको छ । काेभिड–१९ विरुद्धकाे खाेप विकासमा विश्वविद्यालयले ठूलाे सफलता हात पारेकाे हाे ।
एक हजार ७७ जनामा गरिएको परीक्षणमा खोपले एण्टिबडी र सेतो रक्तकोषिका बनाएको र त्यसले कोरोना भाइरससँग लड्न सक्ने खबरमा उल्लेख छ । अहिले देखिएका लक्षणहरु कोरोना भाइरसबाट मानिसलाई सुरक्षा प्रदान गर्न पर्याप्त र अत्यन्तै आशाजनक रहेको विश्वविद्यालयले जनाएको छ ।
खोपबारेमा अझ ठूला परीक्षणहरु भइरहेका बताइएको छ । बेलायतले यसअघि नै यस खोपको १० करोड डोज अर्डर गरिसकेको छ ।
विश्वका दुई सय १३ देशमा फैलिएको कोरोना भाइरसबाट एक करोड ४६ लाख ८३ हजारभन्दा बढीमा सङ्क्रमण हुँदा ६ लाख नौ हजारभन्दा धेरैको ज्यान गएको छ । ८७ लाख ६६ हजारभन्दा धेरै उपचारपछि निको भएका छन् ।
