चार दिन देखि शव अस्पतालमा

पश्चिमबाट पूर्व जानलागेको बसको ठक्करबाट बर्दियामा एक जनाको मृत्यु भएपछि यातायात व्यवासायी र पीडित पक्षबीच कुरा नमिल्दा चार दिन देखि अस्पतालमा शव थन्किएको छ । शुक्रबार ठाकुरबाबा नगरपालिका ५ का २४ वर्षीय रुपलाल थारुको पूर्व–पश्चिम राजमार्ग अन्तरगत बारबर्दिया नगरपालिका वडा नं. ८, थानथेनामा ठक्कर दिएपछि उनको उपचारको क्रममा शिक्षण अस्पताल कोहलपुरमा शनिबार विहान ४ बजे मृत्यु भएको थियो । कर्णाली रिभर साईड यातायात प्रा.लि.को ना ५ ख ७६७३ नम्बरको बसले ठक्कर दिएको थियो । पीडित पक्ष र यातायात व्यवसायी बीच सोमबार वार्ता निष्कर्ष भएपछि उनीहरुले चरणबद्ध आन्दोलनको घोषणा समेत गरेका छन् । सो क्रममा उनीहरुले सोमबार नै भुरीगाउँमा २ घण्टा चक्का जाम गरेका थिए । उनीहरुले आज मंगलबार पनि आन्दोलन गर्ने बताएका छन् । उनीहरुले उचित क्षतिपूर्तीको माग र दोषीलाई कार्वाहीको माग राख्दै आन्दोलन गर्दै आएका छन् । बसलाई प्रहरीले नियन्त्रणमा राखेको छ ।
ईलाका प्रहरी कार्यालयका बाँसगढीका प्रहरी निरीक्षक वीरेन्द्र थापाले पीडित पक्षसँग छलफल जारी रहेको बताए । उनले दुबै पक्षबीच मंगलबार पनि छलफल हुने बताए । यातायात प्रा.लि.का उपाध्यक्ष लभ मल्ले नियम अनुसारको क्षतिपूर्ती दिने बताए ।