पोखरीको माछा मर्छन, अर्को आउँछन्—नेता बस्नेत

रुकुम पश्चिम — नेकपा ओली पक्षीय केन्द्रीय सदस्य महेश बस्नेतले प्रचण्ड, माधव नेपाल र झलनाथ खनालले पार्टी फुटाएको आरोप लगाएका छन् । उनले पोखरीका केही माछा मरेकोमा कार्यकर्तालाई चिन्ता नगर्न आग्रह गरे । ‘खोला सुकेपछि चिन्ता गर्नुपर्ने हो । खोला बगिरहेको छ । खोलामा अरु माछा आउँछन् मरेका माछाप्रति हामीले चिन्ता गर्नहुन्न,’ उनले भने ।
नेकपाको रुकुम पश्चिममा भएको कार्यकर्ता भेलालाई सम्बोधन गर्दै नेता बस्नेतले संसद विघटनलाई आश्चर्यजनक घटना मान्न नहुने तर्क गरे । उनले भने, ‘५ वर्ष कार्यकाल रहेको यो संसद ३ वर्षमा विघटन भयो यसैले यो आश्चर्यको विषय नै होइन ।’ प्रधानमन्त्रीको कदम संवैधानिक भएको उनको दाबी छ । प्रतिनिधिसभा विघटन गर्ने प्रधानमन्त्रीको कदमविरुद्ध भ्रम फैलाइएको भन्दै उनले संविधानमै भएको व्यवस्थाअनुसार संसद विघटन भएको जनाए ।