नेपालगन्ज उपमहानगरपालिका वडा नम्बर ९ का वडा अध्यक्ष विष्णुबहादुर लामाको निधन भएको छ । स्वास्थ्यमा समस्या आई उपचाररत लामाको बिहीबार राती आठ बजे उनको निधन भएको हो । नेपालगन्ज उपमहानगरपालिका वडा नम्बर ९ का वडा सदस्य एवम युवा नेता रमेशप्रसाद तिमिल्सिनाले वडाअध्यक्ष लामाको निधन भएको जानकारी दिए । वडासदस्य तिमिल्सिनाका अनुसार अध्यक्ष लामाको स्वास्थ्यमा समस्या भएपछि दुईहप्ता अघिदेखि उपचाररत थिए । उनको स्वास्थ्यमा सुधार नभएपछि काठमाण्डौं स्थित मेडिसिटि अस्पतालमा उपचारका क्रममा ५२ वर्षिय अध्यक्ष लामाको निधन भएकोछ । जेण्डिस, मृगौला र फोक्सो सम्बन्धि समस्याले ग्रसित लामाका दुई छोरा, दुई छोरी र श्रीमती छन् । वि.सं. २०२५ असार २२ गते जन्मिएका अध्यक्षको २०७७ माघ २२ गते निधन भएको हो । वडा सदस्य तिमिल्सिनाले अध्यक्ष लामाको निधनप्रति गहिरो दुःख प्रकट गर्दै भने अध्यक्षको शव नेपालगन्ज ल्याउने वा काठमाण्डौं मै दाहसंस्कार गर्ने भन्ने विषयमा परिवारसंग छलफल भइरहेको छ ।
१४ जेष्ठ २०८०, आईतवार । 2023/05/28
