बर्दिया — मधुवन नगरपालिका—३ स्थित सम्झना सामुदायिक वनमा बुधबार दिउँसो पाटे बाघले आक्रमण गरी रेनुका सुनारको ज्यान लिएको छ । बुधबार दिउँसो करिब १ बजेर ५० मिनेटमा बाघले झम्टेर लगेको थियो । सुनारको शव दशगजामा फेला परेको प्रहरीले जनाएको छ ।
सशस्त्र प्रहरी बल बीओपी भगरैयाका सशस्त्र प्रहरी निरीक्षक अस्मिन मगरले बाघले आक्रमण गरेको महिलाको शव फेला परिसकेको जनाए । सुनारसहित ६ जना नजिकैको वनमा घाँस काट्न गएका थिए । बाघले सुनारलाई आक्रमण गरेपछि भागेका थिए । सशस्त्र प्रहरी बलले जानकारी पाएपछि घटनास्थल पुगेको थियो । मृतकको शव पोस्टमार्टमका लागि बर्दिया अस्पतालमा पठाइएको छ । बाघको आक्रमणमा परी ८ जनाको ज्यान गइसकेको छ ।
