नेपालगन्ज— बर्दिया राष्ट्रिय निकुञ्जको खाता जैविक मार्गमा नरभक्षी बाघले आतंक मच्चाएपछि उक्त मार्गको हुलाकी सडकको ज्यानमारा बे्रकर हटाइएको छ । बन्यजन्तु ओहोरदोहोर गर्ने भएकाले खातादेखि कोठियाघाटसम्म रहेका दर्जन बे्रकर डोजर लगाएर हटाइएको हो । मधुवन नगर प्रमुख गणेश बहादुर क्षेत्रीको नेतृत्वमा खाता क्षेत्रको मापदण्ड विपरितको ज्यानमारा ब्रेकर हटाउने कार्य गरिएको छ । बे्रकरका कारण मोटरसाईकल र साईकल लगायतमा सवार सर्वसाधारणहरुको ज्यान बन्यजन्तुका कारण जोखिममा परेको भन्दै ब्रेकर हटाइएको नगरप्रमुख क्षेत्रीले बताए ।
बर्दियामा ८ महिनामा बाघको आक्रमणमा परी ९ जनाको ज्यान गएको छ । यसैगरी जिल्ला वन कार्यालय अन्तर्गत खाता जैविक मार्गमा बिहीबार दिउँसो भाले पाटे बाघ नियन्त्रणमा लिइएको छ । त्यसको अघिल्लो दिन गेरुवा क्षेत्रबाट एक बाघ नियन्त्रणमा लिइएको थियो । दुई दिनको अन्तरालमा दुई वटा बाघ निकुञ्जले नियन्त्रणमा लिएपछि बाघको आतंक नियन्त्रण हुने विश्वास गरिएको छ ।
