भेरी अस्पतालको कोरोना वार्ड भरियो, भर्ना बन्द

नेपालगन्ज । भेरी अस्पताल नेपालगन्जको कोरोना वार्ड विरामीले भरिएपछि संकट थपिएको छ । अस्पतालले कोरोना संक्रमितहरुको उपचारका लागि भर्ना लिनसक्ने जनाएपछि अवस्था जटिल बनेको हो । भेरी अस्पतालमा १४२ वटा कोरोना वार्ड बनाइएको छ । तर जनशक्ति अभावका कारण ६५ वटा बेडमात्र संचालनमा छ । ति सबै वार्डहरु भरिएको छ । अस्पताल भर्ना भएका सबै कोरोनका विरामीलाई अक्सिजन दिइको छ । २४ जनाको अवस्था गम्भीर रहेको भेरी अस्प्तालका प्रमुख मेडिकल सुपरिटेन्डेन्ट डा. प्रकाशबहादुर थापाले बताए ।
मंगलबार ११३ जनाको स्वाब परीक्षण गर्दा ५९ जनामा कोरोना पुष्टि भएको थियो । भेरी अस्पतालको आइसोलेशन कोरोना संक्रमितले भरिएपछि स्थानीय तहलाई आइसोलेशन स्थापना गर्न सुझाइएको छ ।
उनका अनुसार कोरोना नियन्त्रण नहुँदै सर्वसाधारणहरुले बेवास्ता गरेका कारण संक्रमण फेरि दोहोरिएको हो । आउने बैशाख र जेष्ठ महिनामा कोरोनाले उग्ररुप लिनसक्ने बिज्ञहरुले सुझाए पनि त्यसको बेवास्ता गरिएको छ । ‘कोरोनाको त्रास सबैले भुलिसके । यसले गम्भीर अवस्था निम्तियाउन सक्ने खतरा छ,’ भेरी अस्पताल प्रमुख डा। थापा भन्छन् । उनले स्थानीय सरकारहरुले फेरि पनि आइसोलेसन र क्वारेन्टाईन सन्चालन गर्नुपर्ने सुझाव दिए । भेरीले मात्रै धान्न नसक्ने संकेत देखिन थालेपछि नेपालगन्ज शिक्षण अस्पतालमा फेरि कोभिड वार्ड बनाउन पहल भइरहेको छ । भारत नगएका स्थानीयहरुमा पनि कोरोना संक्रमण देखिन थालेको अस्पतालले जनाएको छ ।