दाङ — सोमबार भएको लुम्बिनी प्रदेशको राष्ट्रिय सभा सदस्य उपनिर्वाचनमा नेपाली कांग्रेसका दृगनारायण पाण्डे भारी मतले विजयी भएका छन् । ५ सय २८ मतभारले उनी विजयी भएका हुन् । नेकपा एमालेका उम्मेद्वार चन्द्रबहादुर खड्काले ३ हजार ६ सय १२ मत पाए भने पाण्डेले ४ हजार १ सय ४० मत प्राप्त गरे । कांग्रेसका उम्मेदवार पाण्डेलाई माओवादी केन्द्र, राष्ट्रिय जनमोर्चा र उपेन्द्र यादव पक्षीय जनता समाजवादी पार्टी पार्टीको समर्थन थियो । पाण्डे यसअघि एमालेका तर्फबाट लुम्बिनी प्रदेशसभा सदस्य भए पनि सांसदबाट राजीनामा दिएर कांग्रेसमा प्रवेश गरेका थिए । नेकपा एमालेका तर्फबाट उम्मेद्वार भएका खड्का यसअघि माओवादी केन्द्रका तर्फबाट राष्ट्रिय सभा सदस्य थिए । एमालेमा प्रवेश गरेपछि माओवादीले कारबाही गरेको थियो । निर्वाचनमा २ सय ९७ मत खसेको थियो । तीन स्थानीय तहका प्रमुख मतदानमा सहभागी भएनन् । बाँकेको नेपालगञ्ज उपमहानगरपालिका प्रमुख धवलशमशेर राणा, नरैनापुर गाउँपालिका अध्यक्ष इस्तियाक अहमद शाह र गुल्मीको गुल्मी दरबार गाउँपालिका अध्यक्ष अशोककुमार थापा मतदानमा सहभागी भएनन् ।
११ चैत्र २०७९, शनिबार । 2023/03/25
