नेपालगन्ज । केन्द्रमा कांग्रेस माओबादी सत्तामा पुगेपछि लुम्बिनी प्रदेशमा सरकार गठनलाई लिएर सत्ता पक्ष र विपक्षी गठबन्धनबीच सांसद तानातानको अवस्था सृजना भएको छ । जनता समाजवादी पार्टीकी सांसद पुरमति ढेंगा हराएको भन्दै प्रहरीमा उजुरी परेको केही दिनपछि लुम्बिनी प्रदेश सभा सदस्य विमला खत्री वली पार्टीको सम्पर्कमा नरहेको माओवादी केन्द्रले जनाएको छ । विपक्षी गठबन्धनले सत्ता पक्षले प्रलोभन र दबाबमा सांसदहरुलाई पार्ने गरेको आरोप लगाउँदै आएको छ ।
माओबादी केन्द्रको शनिबार हुने संसदीय दलको वैठकमा सहभागी हुन तीन दिन अघिदेखि सम्पर्क गर्दा विमला सम्पर्कमा नआएकी हुन । मुख्यमन्त्री शंकर पोखरेललाई जसपा महन्ठ ठाकुर पक्षका तीन सांसदले सरकार सघाएका थिए । तर उनीहरुको सांसद पद खोसिएपछि पोखरेल नेतृत्वको सरकार धरमरमा परेको छ । तर मुख्यमन्त्री पोखरेलले भने विश्वासको मत लिने बताइरहेका बेला सांसद वलीले माओवादी केन्द्र छाडेर एमाले रोजेको शंका गरिएको छ ।
माओवादी केन्द्रका सांसद ईन्द्रजित थारुले सरकार अल्पमतमा परेकाले सरकार टिकाउन विमलालाई सरकारी पक्षले दबाब र प्रलोभनमा पारेर एमालेमै फर्काएको हुनसक्ने शंका जनाएका छन् । दाङमा भएको उपनिर्वाचनमा तत्कालीन नेपाल कम्युनिष्ट पार्टी (नेकपा) बाट चुनाव जितेकी विमलाले सर्वोच्चको फैसलाले नेकपा खारेज भएपछि माओवादी केन्द्र रोजेकी थिइन् । प्रदेश सभा बैठकमा पनि उनी माओवादी केन्द्रकै लहरमा बस्दै आएकी थिइन् । एमाले संसदीय दलका प्रमुख सचेतक भूमिश्वर ढकालले सांसद वली आफ्नै पार्टीको भएकाले आफूहरुसँगै रहेको र कतै नगएको दावी गरे ।
८३ सदस्यीय लुम्बिनी प्रदेशसभामा मुख्यमन्त्रीको पक्षमा एमालेका ३८ सांसद मात्र छन् भने विपक्षी गठबन्धनमा ४१ मत छ । प्रदेशमा नयाँ प्रदेश प्रमुख आएसँगै विपक्षी गठबन्धन विशेष अधिवेशनको समावेदन गरी मुख्यमन्त्रीविरुद्ध अविश्वास प्रस्ताव दर्ता गर्ने तयारीमा छ ।
