दाहालकै पक्षमा एकीकृत समाजवादी - Dastabej

दाहालकै पक्षमा एकीकृत समाजवादी


  • दस्तावेज

  • अहिलेकै सत्ता गठबन्धनको निरन्तरतामा एकीकृत समाजवादीको जोड

     

    काठमाडौँ ५, पुस :  माओवादी अध्यक्ष पुष्पकमल दाहाललाई पहिलो चरणमा प्रधानमन्त्री बनाउनुपर्ने पक्षमा एकीकृत समाजवादी देखिएको छ । कांग्रेस र माओवादी केन्द्रले सरकारको नेतृत्वमा दाबी गरिरहेका बेला एकीकृत समाजवादीले गठबन्धन जोगाउन दाहाललाई प्रधानमन्त्री बनाउनुपर्ने धारणा ल्याएको हो ।

     

     

     

     

    एकीकृत समाजवादीका उपमहासचिव गंगालाल तुलाधरले माओवादीलाई एमालेसँग सहकार्यमा जान बाध्य पार्नु दुर्भाग्य हुने बताए । ‘माओवादीले एमालेतिर जान हलचल गरिरहेको छ । वामपन्थी सरकार बन्न सक्दैन, अहिले यही गठबन्धनको निरन्तरता हुनुपर्छ भन्ने सन्देश हाम्रो अध्यक्षले दिनुभएको छ’, उनले कान्तिपुरसँग भने ।

    उपमहासचिव तुलाधरले आफ्नो पार्टीसँग प्रभावशाली शक्ति नभए पनि कांग्रेस र माओवादीलाई सम्झाउने भूमिका रहेको उल्लेख गरे । कांग्रेसमा शासकीय कुशलता व्यापक रूपमा उठिरहेको प्रसंग उल्लेख गर्दै उनले थपे, ‘कांग्रेसले ठन्डा दिमागले सोचे हुन्थ्यो । पार्टीमा शेरबहादुर देउवाबाहेक दोस्रो तहको कसैलाई नेतृत्व दिन संस्थापन पक्ष तयार नभइरहेको अवस्थामा बरु दोस्रो आधा कार्यकाल कांग्रेसले लिएर पहिला प्रचण्डजीलाई दिन उपयुक्त हुन्छ । एउटा आत्तिएर अर्कोतिर जाने, अर्कोले यो केही पनि होइन, जेसुकै होस् भन्ने स्थिति बन्नबाट जोगाउनुपर्छ ।’

     

    एमालेसहितका दलसँग मिलेर सरकार बनाउने विकल्पसमेत खुला राखेर दाहालले संवाद बढाएपछि एकीकृत समाजवादीले त्यसलाई रोक्ने रणनीति लिएको हो । सहकार्यका विषयमा एमाले र माओवादीबीच अनौपचारिक संवाद मात्रै भएको छ । दाहालको पहिलो जोड यही गठबन्धनबाट सरकारको नेतृत्व गर्ने रहे पनि देउवासँग सहमति हुन नसक्ने अवस्थामा एमालेसँग सहकार्य हुन सक्ने संकेत उनले दिएका छन् ।

    एमाले अध्यक्ष केपी शर्मा ओलीसँग प्रतिशोधपूर्ण राजनीति गरिरहेका एकीकृत समाजवादीका अध्यक्ष माधवकुमार नेपालले संविधानको रक्षा, स्थायित्व र समृद्धिका लागि भन्दै अहिलेकै गठबन्धनबीच दीर्घकालीन सहकार्य हुनुपर्नेमा जोड दिइरहेका छन् । गठबन्धनमा रहेका दलहरूबीच ‘भोट ट्रान्सफर’ नहुँदा अपेक्षाकृत नतिजा नआए पनि समग्रमा गठबन्धनकै पक्षमा जनादेश आएको र यसको निरन्तरता अहिलेको आवश्यकता रहेको नेपालको भनाइ छ । ‘अहिले वामपन्थी सरकारको कुरा आएको छ, त्यो अलमल्याउने काम मात्रै हो । त्यसको सम्भावना छैन । यही गठबन्धनलाई निरन्तरता दिनुपर्छ,’ नेपालले भनेका छन् ।

    संसद्मा निर्णायक नभए पनि गठबन्धनकै सरकार बने पनि मुख्य पदमा दाबी गर्ने एकीकृत समाजवादीको तयारी छ । प्रतिनिधिसभामा एकीकृत समाजवादीका १० सांसद छन् । शक्ति र सामर्थ्यका आधारमा तीन दलबीच मुख्य पद बाँडफाँट हुने उपमहासचिव तुलाधर बताउँछन् । ‘अहिले मुख्य तीन पदमध्ये यो चाहिन्छ भनेर दाबी गरिसकेका छैनौं । किनभने हामीसँग संसद्मा त्यो शक्ति छैन । गठबन्धन हुँदा कांग्रेस, माओवादी र हामीबीच शक्ति र सामर्थ्यको आधारमा बाँडफाँट होला,’ उनले भने, ‘तर त्यहाँसम्म जानुअघि कांग्रेस र माओवादीको दाबीले समस्या देखियो । प्रचण्डजीले दोस्रो तहका नेतामार्फत एमालेसँग संवाद गरिरहेको कुरा छ ।’

    उपमहासचिव तुलाधरले कांग्रेस र माओवादीबीच दुई–दुई वर्ष र एकीकृत समाजवादीले एक वर्ष प्रधानमन्त्री पाउनुपर्ने आशय भने व्यक्त गरेका छन् । ‘निर्णय नै गरेर हामीलाई यो चाहिन्छ, नत्र गठबन्धनमा बस्दैनौं भन्ने अवस्थामा छैनौं, सहमतिबाट दुई वर्ष कांग्रेस, दुई वर्ष माओवादी र एक वर्ष हाम्रो पार्टी हुन्छ भने पनि आपत्ति छैन,’ उनले भने ।

    नवनिर्वाचित सांसदको बधाई कार्यक्रममा सोमबार एकीकृत समाजवादीका सम्मानित नेता झलनाथ खनालले वामपन्थी सरकार बन्ने आधार नभएको दाबी गरे । उनले सहमतिका साथ सरकार बनाउनुपर्ने र नीति र कार्यक्रमका आधारमा सरकारमा सहभागी हुनुपर्ने बताए ।

    निर्वाचन परिणामलगत्तै मंसिर १९ मा बसेको पाँचदलीय सत्ता गठबन्धनको बैठकले गठबन्धनकै पक्षमा जनादेश रहेको र यसैलाई निरन्तरता दिनुपर्ने निर्णय लिएको थियो । आमनिर्वाचनपछि पनि गठबन्धनलाई कायम राख्ने निर्णय उनीहरूले गरे पनि प्रधानमन्त्रीमा देउवा र दाहालको दाबीले आशंका उब्जाएको छ ।

    यसैबीच, एकीकृत समाजवादीले सोमबार अध्यक्ष माधवकुमार नेपाललाई संसदीय दल नेतामा निर्विरोध चयन गरेको छ । यस्तै राजेन्द्र पाण्डे उपनेता र प्रकाश ज्वाला प्रमुख सचेतक चुनिएका छन् ।

  • ५ पुष २०७९, मंगलवार १०:३८ प्रकाशित

  • Nabintech
  • १. नेपालगन्ज उपमहानगरपालिका १२ द्वारा दाउरा वितरण (तस्वीर सहित )
  • २. चिसो लाई मध्यनजर गदौँ खजुरा ६ मा दाउरा उपलब्ध
  • ३. बढैयातालका बालि बिमितले पाए दाबी भुक्तानी
  • ४. स्टक प्रमाणिकरण र उद्योग नविकरण कागजातहरु १५ दिन भित्र पेश गर्न उद्योगहरुलाई पत्राचार गर्ने निर्णय
  • ५. मुनाल कप फुटवल प्रतियोगिता जारी सोमबारको खेलमा मयुर र मुनाल बिजयी
  • ६. आगामी तीन दिन देशभर अत्यधिक चिसो बढ्ने, साबधानी अपनाउन सुझाब
  • ७. थारु महिला उत्थान केन्द्र द्रारा सहकारीलाई अनुदान