जेष्ठ ३, २०८० नेपालगन्ज — नेपालगन्ज उपमहानगरपालिका भित्र नियमित खोप लगाउन छुटेकालाई खोप लगाउन ‘खोज र खोप’ अभियानमा सुरु गरेको छ । छुटेका र बीचैमा खोप लगाउन छोडेकालाई नेपालगन्जमा ‘खोज र खोप’ अभियानमा ५१ जना जिरो डोज र एक सय ३९ जना ड्रपआउटलाई समेटिएको छ ।
नेपालगन्ज उपमहानगरपालिका स्वास्थ्य महाशाखाका जनस्वास्थ्य निरीक्षक राजन शाहीका अनुसार ९० जना जिरो डोजका बच्चा रहेकोमा ५१ जनाले खोप लगाइएको छ ।
जनस्वास्थ्य निरीक्षक शाहीले छुटेका बच्चालाई अब नियमित खोपमा समेट्ने बताए ।
नेपालगन्जमा हरेक महिनाको ६ देखि ११ गतेसम्म नियमित खोप लगाउने गरिन्छ । अझै ३९ जना खोप लगाउन बाँकी छन् । बीचैमा खोप लगाउन छोडेका २ सय ९४ जनामा १ सय ३९ जनाले खोप लगाएका छन् ।
नियमित खोप लगाउन छुटेका र बीचैमा छोडेकालाई खोप लगाउन वैशाख ३१ गते अभियान थालिएको थियो । नेपालगन्जमा त्यसअघि वैशाख १५ गते पनि छुटेका बच्चालाई खोप लगाइएको थियो । ‘खोज र खोप’ भन्ने अभियान सञ्चालन गरिएको नेपालगन्जमा ६ सय ९२ जनाले बीचैमा खोप लगाउन छोडेको र १ सय ७७ जनाले कुनै पनि खोप नलगाएको पाइएको थियो ।
नेपालगन्जमा लक्षित जनसंख्या कभर हुने तर धेरै बालबालिका खोपमा छुट्ने गरेको पाइन्छ । यसपाली घरधुरी सर्वेक्षण गरेर बीचैमा खोप लगाउन छोडेका, खोप नै नलगाएका तथ्यांक निकालिएर खोप लगाउन थालिएको हो ।
