नेपालगन्ज। असोज २३ गते काठमाडौँबाट नेपालगन्ज आउँदैगरेको भे.१ ख. ३७०९ नम्बरको बसले भे.१३ प. ६१४० नम्बरको मोटरसाइकललाई ठक्कर दिई गम्भीर घाइते २१ वर्षीय मनिषा रोकाको उपचारको क्रममा मृत्यु भएको छ ।

यात्रुवाहक बसले मोटरसाइकललाई ठक्कर दिंदा गम्भीर घाइते भएपछि उपचारका लागि भारतको लखनउस्थित देभिना अस्पतालमा भर्ना गरिएकोमा उपचारको क्रममा उहाँको निधन भएको हो ।

खजुरा गाउँपालिका –२ का २२ वर्षीय तेजविक्रम मल्ल र उहाँकी पत्नी मनिषा रोका गम्भीर घाइते हुनुभएको जिल्ला प्रहरी कार्यालय बाँकेले जनाएको छ ।

सो दुर्घटनामा मल्लको टाउकोमा चोट लागेको थियो भने मनिषा रोकालाई गम्भीर चोट लागेको थियो । उनीहरुलाई उपचारका लागि लखनउ लगिएको थियो, जहाँ मनिषाको निधन भएको छ । मल्लको उपचार जारी रहेको प्रहरीले जनाएको छ । मृतक रोका कोहलपुरस्थित कौसिल्या अस्पतालमा फार्मेसी असिस्टेन्टको रूपमा कार्यरत हुनुहुन्थ्यो ।