गुलरिया (बर्दिया) । बर्दियाको गेरुवा गाउँपालिकाले सञ्चालन गरेको ‘छोरी बचाऊँ, छोरी बनाऊँ’ कार्यक्रम प्रभावकारी बन्दै गएको छ । आर्थिक वर्ष २०७४/७५ देखि सञ्चालनमा आएको कार्यक्रम अन्तर्गत ५५६ जना बालिकाको बालबचत खाता खोली रकम जम्मा गरिएको छ । आव २०७४/७५ मा जम्मा ७४ जना बालिकाको नाममा खाता खोल्न लगाई गाउँपालिकाले दुई हजार रुपियाँ खातामा राखिदिएर कार्यक्रमको सुरुवात गरेको थियो ।
Advertisement
आव २०७९/८० देखि पालिकाले कार्यविधि नै बनाएर बालबचत खातामा प्रतिबालिका पाँच हजार रुपियाँ रकम राख्दै आएको छ । अभिभावकले खोलेको बालबचत खातामा गाउँपालिकाले रकम बचत जम्मा गरिदिने गरेको हो । गाउँपालिकाले सञ्चालन गरेको बालिका बचाऊ कार्यक्रमबाट हालसम्म ५५६ जना बालिका लाभान्वित भएका छन् ।
छोरी बचाऊ कार्यक्रम अन्तर्गत चालु आवको हालसम्म ७४ जनाले तीन लाख ३७ हजार रकम लिइसकेका छन् । अघिल्लो आवमा १३५ जना बालिकाले छ लाख ७५ हजार रकम बैङ्क खातामा जम्मा गरेका थिए । बालबचत खातामा जम्मा गरेको रकम बालिका १८ वर्ष पूरा नहुँदासम्म निकाल्न पाइँदैन । गाउँपालिकाले खातामा राखिदिएको रकमको ब्याज हरेक वर्ष जोडिँदै जाने गरेको छ ।
अधिकांश अभिभावकले छोरीका नाममा रहेको खातामा थप रकम जम्मा गर्दै आएका छन् । बालिकाले रकम पाउनका लागि अभिभावकको नागरिकता, विवाहदर्ता, जन्मदर्ता, खोप कार्डको प्रतिलिपि, वडा कार्यालयको सिफारिस, बैङ्क खाता नं. सहित जन्मेको ४५ दिनभित्र गाउँपालिकामा तोकिएको ढाँचामा निवेदन दिनुपर्ने व्यवस्था छ ।
गाउँपालिकाले बालविवाह गरेका अभिभावकलाई छोरी बचाऊ कार्यक्रममा समावेश नगर्ने हुनाले पनि बालविवाह कम गर्नका लागि सहयोग पुगेको महिला बालबालिका तथा ज्येष्ठ नागरिक शाखाकी प्रमुख रमा पुनमगरले बताउनुभयो । हाल गेरुवा गाउँपालिकामा बालबचत खाता खोल्ने क्रम बढ्दै गएको छ । गाउँपालिकाले छोरीहरूको नाममा खाता खोल्न थालेपछि अभिभावकले छोराहरूको नाममा पनि खाता खोल्ने क्रम बढ्दै गएको छ । गोरखापत्र अनलाइन
