गुलरिया— मधुवन नगरपालिका ८ लालसिंह चोकमा मोटरसाइकल दुर्घटनामा परी दुई जनाको मृत्यु भएको छ। गुलरिया नगरपालिका २ का अन्दाजी २८ वर्षीय देवानन्द यादवले चलाएको भे १३ प २६६९ नम्बरको मोटरसाइकल र टंकबहादुर बीसीले चलाएको भे ६ प ५४१ नम्बरको मोटरसाइकल साढे १२ बजे दुर्घटना भएको हो ।

दुर्घटनामा परी यादव र बीसीसहित तीन जना घाइते भएका थिए। घाइतेहरूलाई उपचारको लागि प्रहरीले बर्दिया अस्पताल पुर्‍याएको थियो ।उपचारको क्रममा साढे १२ बजे यादव र बीसीको मृत्यु भएको हो।

यादवसँगै बाइकमा सवार रहेका घाइते ३२ वर्षीय अनुपम यादवलाई भने थप उपचारका लागि नेपालगन्ज पठाइएको जिल्ला प्रहरी कार्यालयका डीएसपी चक्रबहादुर डमरपालले जानकारी दिए।