काठमाडौँ ।  रसुवा जिल्लाको भोटेकोशी र त्रिशूली नदीमा आएको भीषण बाढीका कारण ठूलो जनधनको क्षति भएपछि विश्व समुदाय नेपालको सहयोगमा अघि बढेको छ। बाढीका कारण ५ सय १७ जना विदेशीसहित ६ सयभन्दा बढी पर्यटकहरू अझै सम्पर्कविहीन रहेका छन्।

अमेरिकी राष्ट्रपति डोनाल्ड ट्रम्पले ओभल अफिसमा कुरा गर्दै नेपालको विपत्तिलाई ‘क्रूर’ घटनाको संज्ञा दिनुभएको छ। ठूला भवनहरू टुथपिक जस्तै बगाएको उल्लेख गर्दै राष्ट्रपति ट्रम्पले नेपाललाई आवश्यक पर्ने जुनसुकै सहयोग उपलब्ध गराउन अमेरिका तयार रहेको बताउनुभयो।

यसैगरी, छिमेकी मुलुक भारतका प्रधानमन्त्री नरेन्द्र मोदीले नेपालका प्रधानमन्त्री बालेन्द्र शाहसँग टेलिफोन संवाद गर्दै सहानुभूति प्रकट गर्नुभएको छ। भारतले तत्काल ५० टन मानवीय सहायता सामग्री काठमाडौं पुर्‍याइसकेको छ भने २४ सै घण्टा हेल्पलाइन र कन्ट्रोल रुम समेत सञ्चालनमा ल्याएको छ।

दक्षिण कोरियाका राष्ट्रपति ली जे म्युङले आपत्कालीन बैठक डाकेर जलविद्युत् आयोजनामा कार्यरत आफ्ना नागरिकको खोजी तथा नेपाललाई आवश्यक राहत सामग्री र टोली पठाउन निर्देशन दिनुभएको छ। त्यस्तै, बेलायती प्रधानमन्त्री एन्डी बर्नमले ५ मिलियन पाउन्ड र अस्ट्रेलियाली सरकारले ५ मिलियन अस्ट्रेलियाली डलर सहयोगको घोषणा गरेका छन्।

संयुक्त राष्ट्रसंघका महासचिव एन्टोनियो गुटेरेस, चीनका राष्ट्रपति सी जिनपिङ, युरोपेली संघ, विश्व बैंक तथा विभिन्न अन्तर्राष्ट्रिय निकायहरूले पनि नेपालप्रति गहिरो समवेदना व्यक्त गर्दै आपत्कालीन कोष तथा सहायता सामग्री परिचालन गरेका छन्। नेपाल सरकारले प्राप्त सबै अन्तर्राष्ट्रिय सहयोगलाई ‘प्रधानमन्त्री दैवी प्रकोप उद्धार कोष’ मार्फत एकद्वार प्रणालीबाट वितरण गर्ने जनाएको छ।