काठमाडौँ- बाढीका कारण प्रभावित बनेको रसुवास्थित माथिल्लो त्रिशूली ३ ‘बी’ जलविद्युत् आयोजनाको सुरुङभित्र फसेका मानिसहरूको उद्धारका लागि ६ सदस्यीय चिनियाँ विज्ञ टोली परिचालन गरिएको छ।

प्राविधिक रूपमा अत्यन्त जोखिमपूर्ण र जटिल मानिएको उद्धार कार्यलाई तीव्रता दिन सरकारको स्वीकृतिमा उक्त टोलीलाई चीनबाट चिनियाँ हेलिकप्टरमार्फत सोझै घटनास्थल (त्रिशूली क्षेत्र) मा उतारिएको प्रधानमन्त्री कार्यालयले जनाएको छ।

नेपाली सेनासँग संयुक्त सहकार्य
संयुक्त अनुगमन: चिनियाँ टोलीले नेपाली सेनाको विज्ञ टोलीसँग मिलेर सुरुङभित्रको वस्तुस्थिति र उद्धारको सम्भाव्यताबारे प्राविधिक ‘रेकी’ (स्थलगत अनुगमन) गर्नेछ।

थप विज्ञ टोली तयारी अवस्थामा: प्रारम्भिक अनुगमनपछि उद्धार सम्भव देखिएमा रसुवा सीमा क्षेत्र (चीनतर्फ) ’स्ट्यान्डबाई’ राखिएका अन्य चिनियाँ विज्ञहरूलाई पनि तुरुन्तै घटनास्थलमा बोलाइने तयारी छ।