काठमाडौँ ।जल तथा मौसम पूर्वाद्धोग महाशाखाका अनुसार देशमा हाल मनसुनी वायुको प्रभाव कायम छ। दिउँसो देशभर साधारणतया बदली रहनेछ। पहाडी भूभागका धेरै स्थानमा चट्याङ्गसहित मध्यम वर्षा र हिमाली भूभागका केही स्थानमा वर्षाको सम्भावना छ। कोशी, लुम्बिनी र सुदूरपश्चिमका तराई क्षेत्रका केही स्थान तथा मधेस, बागमती र गण्डकीका तराई भूभागमा हल्कादेखि मध्यम वर्षा हुनसक्छ।

भारी वर्षाको जोखिम: कोशी र बागमती प्रदेशका हिमाली तथा पहाडी भूभाग, गण्डकी र कर्णाली प्रदेशको पहाडी क्षेत्र, साथै लुम्बिनी प्रदेशको तराईका एक-दुई स्थानमा भारी वर्षाको सम्भावना छ।
रातिको अवस्था: देशभर बदली रही कोशी, बागमती र गण्डकीका हिमाली तथा पहाडी भूभागका केही स्थानमा र अन्य प्रदेशका थोरै स्थानहरूमा चट्याङ्गसहित हल्कादेखि मध्यम वर्षाको सम्भावना छ। कोशी प्रदेशको तराई भूभागका एक-दुई स्थानमा भारी वर्षा हुनसक्छ।

गण्डकी, बागमती, कोशी, कर्णाली र लुम्बिनी प्रदेशका वर्षा सम्भावित क्षेत्रहरूमा सतर्कता अपनाउन अनुरोध गरिएको छ।