काठमाडौँ । अन्डमान टापु क्षेत्रमा विकसित भएको न्यूनचापीय क्षेत्र थप बलियो बन्दै गएको छ। यो प्रणाली अझ शक्तिशाली भएर चक्रवातमा परिणत हुन सक्ने प्रक्षेपण जल तथा मौसम पूर्वानुमान संस्थाहरूले गरेका छन्।

यद्यपि, यो चक्रवात बनेर नेपालसम्म असर पुर्‍याउँछ वा उत्पत्तिस्थल (अन्डमान क्षेत्र) मै कमजोर भएर जान्छ भन्नेबारे अहिल्यै स्पष्ट भइनसकेकाले मौसम पूर्वानुमान महाशाखाले यसलाई ‘पर्ख र हेर’ को अवस्थामा राखेको छ।

मौसमविद् तथा विज्ञहरूको विश्लेषण
रोजन लामिछाने (मौसमविद्, मौसम पूर्वानुमान महाशाखा):

अन्डमान सागर आसपास बनेको न्यूनचापीय क्षेत्र बलियो हुँदैछ, तर चक्रवात बनिसकेको छैन।

यो प्रणाली बङ्गालको खाडी हुँदै पश्चिम-उत्तरपश्चिम सरेर भारतको उत्तरपश्चिम क्षेत्रमा अवतरण (खसेपछि) भएमा मात्र त्यसबाट सिर्जित जलवाष्प न्यूनचापीय प्रणालीका रूपमा नेपाल प्रवेश गर्नेछ।

चक्रवात बनेपछि र यसको शक्ति मापन भएपछि मात्र नेपालका कुन-कुन क्षेत्रमा कत्तिको असर पर्छ भन्ने स्पष्ट हुनेछ।

किसानलाई सुझाव: हाल धानबाली भित्र्याउने समय भएकाले मौसमी अनिश्चिततालाई ध्यानमा राख्दै तत्काल धान नकाट्न र सतर्कता अपनाउन अनुरोध गरिएको छ।

डा. विनोद पोखरेल (सहप्राध्यापक, त्रिभुवन विश्वविद्यालय – जल तथा मौसम केन्द्रीय विभाग):

विभिन्न मौसम प्रक्षेपण मोडेलहरूका अनुसार यस प्रणालीको असर नेपालमा बलियो रूपमा पर्न सक्ने सम्भावना छ।

भारतको उत्तरपश्चिम क्षेत्र (पन्जाब, हरियाणा, राजस्थान, र दिल्ली) बाट मनसुन बाहिरिसकेकाले मनसुन सक्रिय रहेको नेपालतर्फ यो प्रणाली सोझिने र वर्षा गराउने जोखिम उच्च देखिन्छ।

केही मौसमी गणना प्रविधिले ५०० मिलिमिटरभन्दा बढी वर्षा हुन सक्ने अनुमान गरेकाले आउँदो बिहीबारदेखि थप सतर्कता र पूर्वतयारी अपनाउन आवश्यक छ।